Kha Scooty kha oooo....

Scooty hnungah hian bike hian ka tlan ngun tawh hle a, kha scooty kher kher kha chu theihnghilh hi a har ani. Scooty danglam ani lo a, a khaltu pawh engemaw han danglam bik ani chuanglo a, mahse ka hmaa a tlan chhunga a che vel leh thilthleng ho kha ani ka rilru a cham reng chu.

Vanapa hall kawt atanga motor lane hnih sir leh sir a kal inkara two wheeler ho kan in zui phei diah diah lai chuan hmanhmawh zet mai hian a thawl deuh lai hian ka hmaah hian a rawn in zep thawn a. Rawn tlan chak thut speed ti lai tawk chiah a rawn ding leh thut anih avang khan ka ngei ang reng khawp mai a. A hnunga a phurh pa lah chu Blazer nen school uniform ha in smart deuh in a thu ve at a, a khalhtu pawh chu school naupang tho ani a.

Mahatma gandhi lim zawn kan thlen meuh chuan ka nuih an ti za tan tawh a. A khalh chu a rawn chak thut a brake thut style kha anih avang khan, a hnung ami hi a rawn in bin liam leh tep thin a, a dak awrh awrh ani ber mai a, dak awrh e tilo chuan a in siam that hman chuan pangngai takin a thu veleh mai a, insiamthat hmanloh erawh chuan dak awrh zawh a helmet a va intauh chawrh kha ani leh mai a. A khalhtupa hian a thiamdan a ni miau a, an in sawisel pawh ka hre lo a, mahse kala hmuh ngailoh, "alu bag phur a in phur" dik tak chu ka hmu in ka hria a, tha ka ti lehling phian zawk a. Traffic Jam ah an ding a, a ke khinghnih in a in rahkhalh thin bawk nen, an tlan tan leh chian hi thlawhna ke khai lut hi a ang ka ti ber a, a ke hnih chuan zawi muangin arualin an khaichho ta ruai ruai thin a.

Zodin kual kan thleng phei a, kawng te reuh te ah khan bus hnungah kan tlan diah diah lai chuan a kual laiah alo va in rawlh hmanhmawh a, khalh thanglo ani tih a chiang khawp mai. Bus an kual ve dawn ah chuan tlan pelh hleih theih tawh silo, bus hnunglamin rawn nepchep tawh si chu a'n tlan hma leh hret a, a kual lai taka a ding chu a inrahkhalh dawn a, dinglam a hmangthian ani chek ang chu, nge veilam hman ve mai tur ani tih ala hre ve lo zawk, dinglama a in rahkhalh chu kawngsir luikawr pial lai, tuiek deuh reuh ah berkher hian an zuk rap a, a in rap pial a, luikawrah hian an in zep mai dawn takngial, an awm ruai ruai a, a hnung ami khan bangah a han in tlawhkhalh, a khalhtu veilamah a n leh tawh si, an balance buai chi ai chuan accelerator an herh leh berkher a, an tlan lehta deuh, kawng chep si (Bus hi hetih lai hi chuan a ding tawh ani), a hnung ami chu bangah chuan a in tlawh phei ta zeuh zeuh mai a. An khawngaihthlak viau nangin insum chu a har khawp mai. Engtin tin emaw an tlan ngil veleh mai bawk a.

Kawng ngil kan thleng phei chu kawng alo thawl tawh bawk nen thiamber ni awm fahran hian ding chungte chuan an khalh veleh khanglang a, a hnung ami alo chuang thiamlo bawk si a, thut pawh a thutleh hma chuan an kawi leh ta ziai ziai a, a thu leh rang kher asin. An hmaa motor chu su thawithuak in two wheeler line ah chuan an rawn ding veleh mai bawk a. A hnunga chuang hian engmah ala sawi chuang miahlo, mak ve tak chu ani, a thianpa hi a ring rem rem khawp mai.

An in phurh dak leh awrh awrh hnu chuan chhimlam pan bus rawn phei chu a rawn thlen hmaa lo inzeh phei hram kha a'n tum lehpek a. Kha kher kher kha chu ka nuih aza miahlo, a hlauhawm khawp mai. Bus hnunglam khan a rawn vaw thawithuak ani ber a, an pahnih chuan an thle hlek a, an dam hram hram ani. Bus rawng kha hnawihchhah deuh se chu a vaw bur ang tihtur ang tak tak kha ani a. Binding tihna dawr atanga Paula'n Nunna bu a rawn kengchhuak lai an hmu zuai hman in ania ka rin ni.

Hospital road ah chuan kava umpha leh a. Kawng sira taxi lo ding chu a rawn pawn deuh avangin motor chu an tlanmuang a, ani speed chak tawh chu naupang tihtakah an kawi leh zuai zuai a, an hmaa motor ding bumper ah chuan tumlo deuh chung chuan zawi te in anva in su ta hram a. Kawnglaiah chuan hreh tak chung chuan an in bun ta nge nge a. Motor chu a chhiatloh avangin engmah sawibuai a awmlo hlauh a, kawng sira miten an rawn puih nak nak hnu chuan kan tlan leh ta a.

Babutlangah ka tlanpel a, anlo chhuk chu a hnunga thu chu a hmel atangin ti zawk zawk lo, inthlahrung chi tih rin theih mai hi alo ni tak tak a, a driver lah chu khalh thiam pawh nise a buai tho ang tihtur khawp a cher chhia hi alo la ni zui a. Min hre lemlo bawk a, an mahni ka hmuh hnu chuan ka tlanpel ta mai a. Khami ni kher kher kha chu an hre ve reng ang chu.

CMWA hmingin chibai vek u le

Chennai khawpui a mizo awm tamtak ang bawkin ‘tumloh deuhin’ Chennai khawpuiah kan rawn thleng thla ve rawih a. Chennai hrehawm thu leh lum zia thu vawi duailo kan hre lawk bawk a, rilru pawh in puahchah sa ranin kan rawn chhuk a. Airport kan rawn thleng a, thlawhna kawngka atanga kan chhuak chu a lum ta huk a, ama’rawh chu thlawhna propeller hnunglam anih vangin a propeller in thli lum a rawn chhem mai mai amaw kan ti a. Mahse terminal atanga kan chhuan meuh chuan ka in rinlok ve ai mahin khua chu a lo lum tak tak ani tih chu chal kawlh a chhut fawk ang ani nghal pang!

Admission tihfel hnu chuan bazar leh beach te kan han tlawh ve a. Tih tur dang avang khawp mai. Thian ho, la in hre chianglo te te kha kan inkawm nitin ve thin a, mizo dang kala hmu lo a, Monica leh Lalthanzama kha ka hriatlawk awmchhun anni.

Ka rawn chhuk hnu a sunday hmasa berah chuan inkhawm ve reng reng ka duh a, midang chu a hma lama an lo inkhawm tawh avangin an chawlh tum ni kha ani hlauh pek a, keimahin kaldan tur leh kalna tur hrilh thlap hnu in ka chhuak ve thuai a. Egmore Train station hnung lamah chuan ka chhuak ve ngei a, ke a min 5/10 vel kal an tih vangin ka kal risk ta a, dar 3 tan an tia, dar 3 ah chuan egmore station chu ka thleng ve ngei tawh, vepery lamah ka phei tlang a, auto a kal te kha mizo amaw tiin ka zui ve tawp peka. EVK sampath road lamah ka phei a, Vai ho ka zawh lah khan tumah khan Wesley Church an hre silo. St. paul’s church, vepery kava thleng a. Mizo thawm reng reng a awm si lo. Purasavakkam High road ah rawn phei leh a, 7^th day biak In pakhatah an pastor ka zawt leh a, Mizoram chu a lo hre ve a, Mizo ho inkhawm na a hre chuang si lo. Ka kal zel a, ka beidawn tawh hnu ah dawr ah ka in ei puar a, haw paha ATM atanga pawisa ka la zo chu Egmore wesley church chu ka hmu ta kuau mai a. Luh loh law law ka tum laiin “Valin ka chhuahchhan ber ka hmuh ahnu,” biak in chu ka pan phei ta chawm mai a, thih leh thih. Chumi chuan 4:20 ani tawh. Mizo ho chu anni ta ngei a, semon kha ala zo lo deuh a (tan kha 3:30 alo ni zawk a), receptionist te nuih tlawn deuh reuh pah chuan ka lut zal zal a, a hnung berah inthlahrung takin kava thu a. Zama samsei kava hmu chu tlem chuan ka tlangnel nghal deuh a. Inkhawm banah chuan hmelhriat hlui dang pakhat ka hmu leh tih loh chu he chennai ah hian hmelhriat 3 bak ka nei lo tak zet tih ka chiang tawh hle a. Ka mikhual sawtin kan in hre leh hnuhnawh a!

Kum alo vei a, tamil ho zia kan han hre tanin, an veng hming lamdan te kan thiam ve tan a, khawpui chhung pawh kan han vak zau a, Khua chu lum mahse hrehawm lutuk kha chu a ni chiah biklo tih chu ka hre chho ve a. An lui tui pawh avai vai chuan a uih biklo tihte pawh kan hre zel a (uihlo hi kala hmu lo a, mahse uih veklo an ti miau awm tawh ten). Mahse tum chiahloh leh peihtawhloh lama phaia awm leh tih takah ka lo ning ve hle ni tur ani, 2009 chrismas ka haw theilo tur anga an han sawi kha chu rilru tak tak khan ka lungngai ve ani. Mahse ka haw veleh ta hram a. Lawmawm in.

Kum 2 alo vei meuh chuan nuam pawh kan lo ti tan ve a. Tamil ho pawh an that an felna laite leh an zeizia te kan han man chhoh ve takah chuan a hrehawm em em te a lo reh chho a. India ram hmun dang zawng ai chuan min hmuhsit lohna tak ni ten ka hria a (Mizoram leh NE lam an hre lo em a, ngo hrim hrim hi an ngaihsan rum rut vang te pawh ni mahna). Kan hriat ve chhun te te tha hi kan ti ve em em a, chenna tlak khawpui anih zia kan hrethiam ve a. “Thawh chhunzawmna tur tha deuh pawh awm se a pawi lem lo mawle” kan ti tan tawh a. Mahse in hauh an awlsam leh peih lutuk hi chu ngaiah kala nei thei lo ani.

Mizo lamah pawh hmelhriat thar kan nei ve tan a, Mizo community pawh mi min sawithaih lawk aia alo nawm em em si zia te kan hre ve ta zel a. Khawpui dang mizo te hian an thik vanga sawi chhia amawn chu ka ti let rilru hial zawk. Inkhawm bana mi chi hrang hrang kan han ding khawm a, in melh ru zeuh zeuh han awm nawk te, in be chak in be ngam silo phu suau suau te hi! He hun hi ava tah in ava uihawm si em! He hun reilo te hi malsawmna ah han chang thei thin teh se aw. Function kan nei tlem nanga kan neih chhun nawm thin si zia te, Sawihmaih phalloh, kan President Pu Lawmsanga kaisan kan lawm tum, hun nuam ropui lutuk thlen laia ka awm te kha ka lawm thar leh thin. Officer mess laichhuat kan mawi zia kha! Mahse nuam kan ti ve tan dawn chiahin sulhnu kan nei ve tan dawn chiah a, kan chhuahsan alo hun der a!

Ka damchhung kum 2 he khawpui nuam leh thangduang taka ka hmang ve hi inchhirna tur ka hre lo. Hriat tam pauh leh zirtur leh mahni mai ni lo midang leh ram tana tangkaina tur ka hmu hnem a, Hriatna tamtak ka chhar ve a, hlawkna tamtak nen ka haw dawn ani.

Mahse Mizoram boruak vawt diai mai leh a lum lai pawha nuam tawk chiah atang chuan chennai khaw lum nuam tak, kumpui linglet a thawmhnaw lum reng reng ngaih lohna hi ava ngaihawm dawn em! Bawng ek leh bal tinreng Mizoram lama awm ve lo tur te hi hnuk a ulh thei mai dawn. U Mawitei, chennai legend ropui lutuk, CMWA history a hming chuai leh tawh ngailo tur hmu hmana ka awm te hi mahni pawh in chhuan ve larh na tham. Mahse Chawia, chennai tlangval fel chhuan vawr, nula strong hold a hotupa, nula in a an zim huai huai chung pawh a tun thleng thleng a single a in la dah thei hi chennai nula te erawh ka dem na hle mai che u.

1 Jan atanga 31 dec thleng a Thosi awmloh lai reng reng awm lo te hi khawvel khawpui lian dang zawng aia a ‘cial na ani, aizawl ah chuan awm veleh dawn hek lo i. Sahuan han kal changa samak bula kan awm lai reng pawh a, a samak aia mak min tihna hmun, sikul naupang in a min en tak vung vung zawk na hmun te hi ava ngaihawm dangdai dawn e o. Bus leh local train tawt lutuk maiah nipui laiin kan han in hnawh lut ve a, thlan rim nam huam huam karah perfume man tlawm rimna zet rim anlo nam cham cham a, perfume a zawngah chuan rim huatthlala ber ani awm e. Thlan tui tih hriat fahran in min han nek ban chap a, lukolh deuh lu a thlan mawm deuh tawh ah ban kan han dek ban deuh chap chap a, thil dang ngaihtuah san tum pawhin, a rawn ban leh chap thin. Hriatreng turah chuan a hriatreng tlakloh ber awm asin!

Choolaimedu lamah leng ila an lo ni huau a, mipa awmkhawm tih takah nuih tur atam, in hrang hrang in rules hrang hrang, rules tura kan lo ngaih ngai lemloh, khirh tak tak thlengin an lo tlar diat diat a. Chepauk lamah lah Putara te Pitari te dil alo ngai thul, thenkhatah an hriatloh a luh ruk zal zal angai thul, thut tui laia in hnawh chhuah lah bo lo. Chaw eia sawm, ei rawngbawl vek tawh hnu, chaw ei hma si a hnawhchhuah tawk te pawh an awm ni awm ania! Veng hrang hrang VCP te kan han dahsan thiam zia te hi a tha asin. Tambaram lam kan len ve dawn apianga min hruai tur ber ‘a lo vellore’ leh daih mai thin hi chuh, enge maw a tih zozai ni? Pallavaram a chhungkaw khat awm vete in a rawn leng apiang nuam ti hahipa sawi chungin an haw ziah te hi tu thiamloh mah hi a awmlo, chennai hi a nuam sawhbeh mai ani tih hi a chiang ngawih ngawih ani ber mai e. “These hand prints on the footsteps are mine” kan la ti fo dawn ani. Kan tuan a tul tawh si.

This is my CMWA, You are my family away from my family. Hei hi chennai, ka khawpui, ka thatlai leh hlimlai nite ka hmanna, Puitlinna kawnga min hruaitu ani. Ka dam chhungin ka nghilh tawhlo ang che. Mualza tam kar danah leng dawn mah ila, rilru chhung rilah hmun tha lai tak ah i awm kum khua ang.

Khati zawng kha vawiin a kan puan theih te chu anni. Ka lawm e.

LALPA KA LAWM E

A mit en mai chuan mitdel laka danglamna reng a awmlo. Meng manglo kha a khap ve suk suk tho a. A mitkhap dan suk suk ah kha chuan mi anglo a ang khawp mai. Mahse a inchei dan leh a thil ken te atanga en chuan "Mi ang lo pawh nise a theihtawk chuan hna chu a thawk a nih hi," ka la ti rilru a. Ka opposite chiah ah chuan a rawn thu a, a hnungah chuan Nungambakkam station tih inziak chu ka hmuthei a. A kamis paw-uk hak kawr hma ipte ah pawh chuan pen pahnih hi a pai ran a. Smart pangngai taka incheiin bag khai chi hi a pawm ran bawk a. A hnuah a benga earphone a vuah chu ka hmuh leh a, hla a ngaithla ve ngei dawn anih hi ka tih rilruk lai chuan a ipte a a mobile ah chu a rawn phawrh a.

A tarmit pawh chu a chhah tha lang lang khawp mai. Eng anga glass zang chi pawh hmangse zan ngaihna hi a awmlo hrim hrim mai a. Han en mai chuan a power chu plus emaw minus pawh nise 10 ai chuan a tlem lo hrim hrim ang. A benga a bahna lai pawh chu beng hualpap a inbat chi kha ani a, Engemaw avangin titla hlauh pawh nise a tan chuan chu a tarmit chu hmuh leh ngaihna a awmlo hrim hrim a. Chuvang te pawh chu a ni mahna, a benga a bahna a that tawh tehreng nen, a nghawnga awrh na anla siamsak leh zel ni. Local Train a a chuan lai chuan a ngaih angam hle ni tur a ni, a bag pawm chungah chuan a dah ran a.

Chutia a chetla vel chu ka en reng mai a. Kan din leh meuh chuan Mi an rawn lut huk mai a, Mambalam station kan lo thleng leh reng tawh chu niin. Mi chetla han en reng chu nuam lo ka ti angreng hle mai a, mahse ani chuan min rawn hmu thei ve hek lo le, ka inthiam rilru leh ta zawk a. Mihring an tam tak avangin ka hmu reng thei talo thuai a. Vendor car ah kan chuang a, hma a mi te hi an thu hla bik a.

A tarmit chu ahan vuah a. A tarmit hnungah chuan a meng suar suar a, ala khap fuk fuk tho a. Chutia a mobile a lak chhuah ahan hmet tur chu a mit atanga inches hnih emaw vel, atarmit atanga inch khat velah chuan a hmet ta chat chat mai a, chu pawh chu a mit pahnih in a en theilo, a mit dinglam a en athlang zawk a, a dingkhawr pawh ani mahna. Dingkhawr hi chuan mit dinglam a kenhnaih hi kan hrat zawk thin a. A mobile an lek dan vel chu mi pangai lekdan ani lo hrim hrim a, a khawih nuap nuap a, a khawr tut hian ahriat bawk.

Pallavanthangal kan thlen phei chuan ka rilru ah chuan, chu ka hmaa thupa tawrh nasat tur zia chu ka ka ngaihtuah zui ta vak mai a. Ani chuan a tuar ah angai lutuk lo maithei. A chang chuan hrehawm te chu a ti ve mahna. Mahse keimah nita ila, tarmit takngial pawh bun ngailo khawp a mit tha, uar tak tak lai phei chuan computer games pawh nileng a lu leh mit na miahlo a khel thei kha kan ni ve reng a.

Tarmit chhah lutuk bun a, thil en tur apiang tarmit bul hnai set ah, tarmit tauh bap chang awm khawp a hnai a ken ngaifo ta se, tun a ka dinhmun atang chuan ka khawvel hi a thim mup dawn ni ber hian ka hria a. Ka ngaihtuah zawng ringawt pawhin ka bing chuai chuai ani ber. Piansual a zawng ah mitdel hi ka hlauh ber hi ani ve hrim hrim bawk a.

Zanah mut dawnah kan tawngtai a, a chang phei chuan chhamtur em em pawh hriatloh chang te ka ngah thin. Chham tur hi alova tam si em! Mit tha a kan awm ringawt pawh hi, zantin lawmthu sawina tham alo ni reng mai. Vairamah chuan mi pangai pur a lang pawh hi pianfello neuh neuh, fuke kimlo leh extra neuh neuh nei hi an tam hle tihte pawh ka ngaihtuah kai ta zel a. Keini tehlul, thatbikna neilo, Pathian khawngaihna avang chauh a fuke kim, piansualna leh sawisel tur nei lo a siam te hian, a tur reng amaw tiin Pathian hnena lawmthu sawina chang pawh kan lo hrelo fo alo ni. Local train la la ah chuan ka rilru te te chuan ka tawngtai phei pah ta reng a. “Lalpa ka lawm e,” ka ti phei ta mial mial mai a.

Pallavaram kan thlen meuh chuan chhuk a lo hun ve reng mai a. Chutah ka tan liau liau a rawn tirh emaw tihmai tur hian mitdel pakhat hian mobile hi alo hmang leh a. A han hmet nauh nauh a, a hmeh ri chu a ngaithla reng a, a duh a hmet ta maw tihah chuan a han dial a, an ngaithla a, a ri atangin a diklo tih a hre thei nge ni, a hriattheihna an siam nge mawni a bengbul atang chuan a la thla leh ta vat a, an hmet leh a, angaithla leh thin a, kan kalpel phei ta a.

Piangsual a min siamloh avang chauh pawh nilo in, piantha pangai a min siam vang ngawt pawh hian lawm hliah hliah tur kan lo ni.

Aizawl kha min lo biak dawn nia

Kumpui lingletin, a then kum chanve tal zet he khawpui lum nuam tak
maiah hian kan lo cheng ho ve leh ta. Unau angin, thian angin, athlum a al eiza a, hlim,lawm leh lungaih intawm tawnin. Nitin, kartin tawng hriatloh hre nawk nawk chungin he khawlum hi kan lo tuar za a, alum zia thu veng tina mite kan in hrilh tawn a, “Kan veng alum lutuk a,” “Kan veng hi alum zawk thin, current ala awmlo zui!” kanva khawngaihthlakawm chuangtlai tak em! Puja, Diwali, Navrati te kan hman pui lawp lawp hnuin Krismas hun kan thleng ve dawn ta. Kan ram, kan chhuan em em, kan chhak tlang Mizo te tana khawizu leh hnute tui luanna ram, kan Paradis - Mizoram lam panin in haw leh dawn bik chu a niah. Aizawl in thlen hunah keini a haw ve theilo te tan hian Aizawl kha minlo biak anga krismas chibai minlo buk sak dawn nia.

Kan ngaih zia thu te, a hmel hmu tura rawn haw ve kan chak zia te kha thinlung leh tihtak zet khan minlo hrilh sak ula. Keini zawng exam neih dawn avang te, hna avang te leh chhan khirh un lutuk mihring tawng renga sawifiah thiamloh avang te a haw theilo te kan ni nawk sia. “Please come home for Christmas” pawn min ko haw theilo nih hi! Kumin krismas chu i hriatthiam mai anngai dawn a ni min lo tihsak mawlh mawlh rawh u aw. Thlawhnaa haw te khan Phunchawng leh RV in thlen hunah “He khua ve te mai mai pawh hi tuifinriat kam atang chuan thlen hlan an nghakhlel ani” tih kha in rilru in min lo hriat sak ula, zurui in hmuh hlauh phei chuan, “Vaiho rui ai chuan in hmuhnawm tho tho, a thing rim rau rauah in thing rim hi a rimtui bik an ti”, tih kha minlo hrilh sak hram dawn nia, tlan pelh pah khan.

Vaivakawnah traffic jam-a in tan hunah pawh khan Aizawl chhung anih avang tal pawh khan lo phun suh ang che u, keini tan zawng Chennai four-lane kawng ai chuan Aizawl traffic jam reng mai kawng pawh khan kan lung a dum ngawih ngawih a ni tih kha hre reng ula. Tin, temple ah in tang chho leh ngei anga, chutiang zelin chhim lam leh hmar, chhak leh thlang lam pan zel te tan pawh, Aizawl traffic jam a nih chhung chuan traffic jam hi nuam kan ti ang tih kha lo hre reng bawk ru o. Enge hmangaih tak te chu an chawnpuar bing tim tem lai takah te, a mitkalh lai takah te alawm le hmangaihna a beh tlat ni. An hakuh in min kuh hnan an ti thin bawk ni lawm ni khah?

Krismas boruak alo ni anga, Lengzawngte hlimna ber Khuangchawi thla ah piang mah ila, December thla kher hi chuan min chhuhsak tep thin in ka hria. He thlaa in ho tur, Mizo ila ni zui lehnghal hi Malsawmna pakhat vui thiang miahlo chu ani ve reng reng. Mizo chu ni lola aho der dawn sin! Bus-a ho te khan kan thingtlang lam unau ten he hunpui hman nawm veloh hlau reng reng a Aizawl a neih thinglung khawng a an rawn bazaar haw lam sumo chunga seat changlo ho thu bei fur mai te kha in han hmu bik dawn nia! Krismas ti krismas em em tu pakhat chu anni ve tlat. Keichu sumo a haw ngei hi ka duh thin. Ahma zawnga langlo Aizawl kha Durtlang leitan kan tlanpelh rualin an rawn lang thut maiah, tiauchhum lo paw riai nen, Durtlang boruak vawt var maiah thophang tawkin shawl kar atangin kan han hawi chhuak veu maiah. Hmanlai khan lo piang tawh ila chu hei ngei hi a lawm „hnunglama sabarh chu‟ tiin ka tang na viau ang.

Krismas bazaar kha new market velah khan an bawr leh luih luih anga, an in nek leh tulh tulh anga. Helama vai rimchhe tak tak bus leh local train a nek ai chuan nek an nuam ani tih kha hre reng ula, min hreve reng ani tih lantir nan kan hmingin inlo han nek tawlh tawlh dawn nia. Taka, pherh ho kha ka hmingin lo sik sawk ru, anloin rawlh veleh sek awm si. Tin, khawlai leh bazaar ah te ui ek in hmu hlauh anih chuan “Bawk ek ai chuan I mawi tho tho, uih pawh I uih nep zawk, I shape pawh analh hi, I pherh hluai lo a, in in hlum fel thek alawm” kan ti ngei dawn tih hria in Aizawl ek thlahdah kan neih chhun kha ten thlir in inlo thlirlo dawn nia.

Sikulpuikawn, Zarkawt, Chanmari, te kha a mawi leh awm vei! In hmu dawn bik lehnghal! Hmuh kan chak ve. In vanneihna a thuah, kan lungaihna a pung. Ho
inti thianglo ania, in chenpui ten kan hmuh ve chak em hi. Chennai a hengte chu khawlum avang tal pawh hian pumkhat kan nih kha hre reng in. Lungngaih intawm tawnin, hlim in hlimpuiin. Vaiho lah hi bo thei lutuk, Lunglen haw chak nak laiin min rawn “HAPPY CHRISMAS” leh chuih chuih amaw kha nianga, hnek pawpa, melh ruma, pawr tawka “MERRY” han hrilh thuai mai hi a chakawm thin. Merry leh ry-lo hian kawngro a su em, thanhlen pui tawh ani miau a.

Zemabawk atang ngei mai khan zanah Aizawl han thlir ilah, Coffee han dawm khu vang vang mai ila, “Rapapam pam” “Chrismas nangnen” “Jingle bells” te in han in awi riai riai ilah, December boruak vawt ver maiah, tiauchhum khuh chek hnuiah khan current alo eng sen, eng, var, hring pawlh leh tiar anga. Rilru te te chuan New York, London, Paris, Tokyo te pawh hei ai chuan a mawi dawn chuang em ni tih mawlh kha a ngaihtuah leh anga, lung ti leng ah phei chuan a ne pawh an ek pha dawn der silo. Taka, kan veng riangte Nursery veng kal pel tur in awm hlauh chuan Pu Sela te inbul step atang khan kan veng kawn thlalak kha min lo thawn ru aw, in duh zat zat in ka lo khul ang.

Urlawk zan leh Kumhlui thlah zanah in va awh awm lehzual dawnin kan va khawngahthlakawm zual dawn tak em! Ngaihtuah lo law law ila kan hlim zawk ang em? Vawksa rep te pheichu sawiloh atana nuam ani. Sawi zawng ringawt pawh hian hnuk a khawih tlat. Kan ngaihtak bulah kan awm theilo miau anih chuan, “I‟ll Aizawl you in my dreams, close my eyes and take away this distance in between…” kan lo ti ve tawh mai aniang chu. Israel temah babulon lui kamah Pathian fakna an sa tui lo ania, keini tehlul hi kan tui dawn em ni? Teuh lo mai. “Kan ngai top a ni mai, “The Greatest gift of all” an rawn hawn ang che an ti” lo ti ula kan ngaih em em Aizawl chuan alo hre thiam mai ang, kan in hre tha alawm. Kan ngaihdan tur chu alo hrethiam mai ang.