Missionary Retreat ka chhim ve

Ni 10 July 2011 khan Missionary Retreat chu chawhnu inkhawm chhim turin ka han kal ve a. He inkhawm hi 2010-2011 chhunga missionary thi te sunna huna hman tur ani a, ka thianpa cousin hi sun turte zingah chuan a tel ve a, kalpui tura min sawm angin ka han kal pui ve a. A hmun hi Durtlang Presbyterian Kohhran Biak In a ni a.

Kan han thlen chhoh chuan dar 1:18 PM ani a, sun turte chhungte thutna an lo zuah kha kan la chan ve hlauh avangin tlar hma lamah chuan kan va thu ve vang a. Kan luhlai chuan an lo zai tui khawp mai a, an lo lam mup mup mai a, tawngtai zawh chuan kan zai zui ve a.

Lam tuala lam chu an tam nangiang mai a. An lam kual mup mup a, lam dan chi hrang hranga lam an tam a, mahse buai em em an awm mang tlat lo. A then chu zai manglo a rawn kalkual ve char char te an awm laiin, a then chu maimit chhing a zai tawn tawn paha rawn lamkual te, a then lam zei taka ti darh darh te an awm nuai mai a. A tu pawh mai kha an hmel a hlim in an fak an hre chiang a, hmuh an nuam. Kan hma tlar 10 vel awm ah chuan camera man hi mipui hmachhawn zawngin a awm a. Kan zai fe hnu a a rawn ding chu ka hmuh hmasak ber kha ani a. A tarmit hi a hnar hmawr hla deh dawh ah hian a dah vang a, a tarmit chung atanga chuan camera eye-piece laiah chuan an en ra a, a makna ala awm hran lo a, mahse a thut hnu pawh chuan a hawikual vel pawhin a tarmit chung atang hlir chuan a hawi kual a. Ban hnu pawna kan in hmuh thleng pawh chuan a tarmit chungah hlir chuan ala meng a! Dangdai ve tak chu ani.

Hla 4 ka sa ve hman a, inkhawm tawp thlengin. Kan hla sak ho kha khuang pawh a rang zaih zaih khawp mai. Hla bu en lo a, a chang sawi ngaithla a zai tur phei chuan a hla thu kan lam hman meuh lo hlawm ani. Mahse lam zinga tar ha bal siu seu in hla thu an lam hman ka hmuh kha chuan ka tlawmngai ve deuh hlek a, mahse a har chu ka ti ani. Average in hla pakhat kha minute 7 vel an sa tlangpui a, a lam ho kha vawi 4 an rawn vei kual chhuak hman a, lam tual kha a lian hle a, concentric in circle li awm ang ani a, lam pawh an tha hnem a, zai pawh anuam. A tempo kha kha ai khan muang ta deuh se a thu lam nuam turin ka’n ti ve chhin a, mahse a hla zelah khan a tempo kha a lam ho chetvel dan nen khan a in hmeh tawk viau zel a, a ran/muan chuan a dik dawnlo tlat a hriatna te ka’n nei leh hnuhnawh a, a tawpah chuan a nih ang ang chuan keimah ka insiam rem ta zawk a.

Kan han tan ta a, chairman chuan bible chang chhiar in un tak mai chuan an tawngtai ta a, mahse ka rilru lo la lai tak chu “Missionarytreat” ati tlang mai kha ani leh tlat pek anih chu, a bei awlsam angreng khawp mai. ITI bial zaipawl an rawn zai a, pa pakhat lo lam derh derh kha chu cartoon a cinderella, snow white, etc te an zai a, chawngzawngin an lo thlawh hual vel ka hre chhuak uai uai. Thla zap a ang em ani.

Missionary sun turte leh an chanchin an han chhiar chhuak a, mi 6 sun anni a, an sun turte chhungte kha an din tir zel a, ka hma ami kha vawi 4 ading bik! Missionary te kha an missionary naah khan zirtirtu te, craft teacher te, puanthui thiam te, zirtirtu te, evangelist te leh adang tam tak atan an chhawr thin a, mi chaklo tan leh Pathian rinchhan chunga tih loh chuan tan rei ngaihna a lo awm lo reng reng alo ni.

Thusawitu in thu a sawi a, hemi inkhawm ah hian thupui “lawm chunga rawngbawltute chan” tih a rawn thlang a. A sawi par par a, tuitakin a sawi a, vanram chanchin kan sawi thin dan hi, keichu ka hmin lemlo khawp mai. “Rangkachak leh lunghlu kan tehkhin thin te hi tehkhin rual ani lo, vanram chu a fai, thianghlim, ropui lutuk a rangkachak leh lunghlu te chu bawlhhlawh leh hlutna neilo ang hial ani” an ti dam dam a, a ropui hmel khawp mai a rik danah chuan, mahse khang inkhawm zing mai bakah khan mizo mipui 0.01% hian lunghlu chu kan hmu tawh angem? Rangkachak hlutna leh a man zat hria hi chhiar tham lek kan awm mai lo maw? Tih te ka ngaihtuah a. Bakah a thu hi ngaihruat tur thil vek ani a, a inkhualtelem thu tawk lek ka ti. Mahse hman atanga an sawi fo thin dan a ni a, a tha viau ani chek ang chu tun thlenga an la tehkhin fo thin ni.

Zep thu a cheng lo, a thusawi ngaihthlak atang khan thlarau lamah chuan hlawkna ka nei vak lo. Thusawi atanga thlarau lam hlawkna neitur hi chuan a thawhfuh tum hi angai ve deuh bawk a. Mahse missionary te chanchin ka han hriatbelh teuh a, Dibrugarh kan awm laia arunachal east a kan missionary te ho te kan hmu leh hlawm a, lung an ti leng hlawm khawp mai. Free clinic kan han neihpui lai te, an hnathawhna hmun khasan leh lakla hmun vela kan han kal a, kan han riah ve zak zak lai te, petromax khawnvartui pump chawp ngaih hmanna, current awmloh na, biak in chhuat leh tihmam chawp, a kawng pawh kea minute 5 vel kal ngaihna hmun kan han kal ve tum te kha ka hre chhuak a. A ril tak chuan han hriatpui lo mah ila, an thawhna chungchang an sawi kala hriatreng ho te kha ka ngaihtuah zui a, hlawkpui hle ah in ngai tak chung tho siin kan haw san ta a.

LALPA KA LAWM E

A mit en mai chuan mitdel laka danglamna reng a awmlo. Meng manglo kha a khap ve suk suk tho a. A mitkhap dan suk suk ah kha chuan mi anglo a ang khawp mai. Mahse a inchei dan leh a thil ken te atanga en chuan "Mi ang lo pawh nise a theihtawk chuan hna chu a thawk a nih hi," ka la ti rilru a. Ka opposite chiah ah chuan a rawn thu a, a hnungah chuan Nungambakkam station tih inziak chu ka hmuthei a. A kamis paw-uk hak kawr hma ipte ah pawh chuan pen pahnih hi a pai ran a. Smart pangngai taka incheiin bag khai chi hi a pawm ran bawk a. A hnuah a benga earphone a vuah chu ka hmuh leh a, hla a ngaithla ve ngei dawn anih hi ka tih rilruk lai chuan a ipte a a mobile ah chu a rawn phawrh a.

A tarmit pawh chu a chhah tha lang lang khawp mai. Eng anga glass zang chi pawh hmangse zan ngaihna hi a awmlo hrim hrim mai a. Han en mai chuan a power chu plus emaw minus pawh nise 10 ai chuan a tlem lo hrim hrim ang. A benga a bahna lai pawh chu beng hualpap a inbat chi kha ani a, Engemaw avangin titla hlauh pawh nise a tan chuan chu a tarmit chu hmuh leh ngaihna a awmlo hrim hrim a. Chuvang te pawh chu a ni mahna, a benga a bahna a that tawh tehreng nen, a nghawnga awrh na anla siamsak leh zel ni. Local Train a a chuan lai chuan a ngaih angam hle ni tur a ni, a bag pawm chungah chuan a dah ran a.

Chutia a chetla vel chu ka en reng mai a. Kan din leh meuh chuan Mi an rawn lut huk mai a, Mambalam station kan lo thleng leh reng tawh chu niin. Mi chetla han en reng chu nuam lo ka ti angreng hle mai a, mahse ani chuan min rawn hmu thei ve hek lo le, ka inthiam rilru leh ta zawk a. Mihring an tam tak avangin ka hmu reng thei talo thuai a. Vendor car ah kan chuang a, hma a mi te hi an thu hla bik a.

A tarmit chu ahan vuah a. A tarmit hnungah chuan a meng suar suar a, ala khap fuk fuk tho a. Chutia a mobile a lak chhuah ahan hmet tur chu a mit atanga inches hnih emaw vel, atarmit atanga inch khat velah chuan a hmet ta chat chat mai a, chu pawh chu a mit pahnih in a en theilo, a mit dinglam a en athlang zawk a, a dingkhawr pawh ani mahna. Dingkhawr hi chuan mit dinglam a kenhnaih hi kan hrat zawk thin a. A mobile an lek dan vel chu mi pangai lekdan ani lo hrim hrim a, a khawih nuap nuap a, a khawr tut hian ahriat bawk.

Pallavanthangal kan thlen phei chuan ka rilru ah chuan, chu ka hmaa thupa tawrh nasat tur zia chu ka ka ngaihtuah zui ta vak mai a. Ani chuan a tuar ah angai lutuk lo maithei. A chang chuan hrehawm te chu a ti ve mahna. Mahse keimah nita ila, tarmit takngial pawh bun ngailo khawp a mit tha, uar tak tak lai phei chuan computer games pawh nileng a lu leh mit na miahlo a khel thei kha kan ni ve reng a.

Tarmit chhah lutuk bun a, thil en tur apiang tarmit bul hnai set ah, tarmit tauh bap chang awm khawp a hnai a ken ngaifo ta se, tun a ka dinhmun atang chuan ka khawvel hi a thim mup dawn ni ber hian ka hria a. Ka ngaihtuah zawng ringawt pawhin ka bing chuai chuai ani ber. Piansual a zawng ah mitdel hi ka hlauh ber hi ani ve hrim hrim bawk a.

Zanah mut dawnah kan tawngtai a, a chang phei chuan chhamtur em em pawh hriatloh chang te ka ngah thin. Chham tur hi alova tam si em! Mit tha a kan awm ringawt pawh hi, zantin lawmthu sawina tham alo ni reng mai. Vairamah chuan mi pangai pur a lang pawh hi pianfello neuh neuh, fuke kimlo leh extra neuh neuh nei hi an tam hle tihte pawh ka ngaihtuah kai ta zel a. Keini tehlul, thatbikna neilo, Pathian khawngaihna avang chauh a fuke kim, piansualna leh sawisel tur nei lo a siam te hian, a tur reng amaw tiin Pathian hnena lawmthu sawina chang pawh kan lo hrelo fo alo ni. Local train la la ah chuan ka rilru te te chuan ka tawngtai phei pah ta reng a. “Lalpa ka lawm e,” ka ti phei ta mial mial mai a.

Pallavaram kan thlen meuh chuan chhuk a lo hun ve reng mai a. Chutah ka tan liau liau a rawn tirh emaw tihmai tur hian mitdel pakhat hian mobile hi alo hmang leh a. A han hmet nauh nauh a, a hmeh ri chu a ngaithla reng a, a duh a hmet ta maw tihah chuan a han dial a, an ngaithla a, a ri atangin a diklo tih a hre thei nge ni, a hriattheihna an siam nge mawni a bengbul atang chuan a la thla leh ta vat a, an hmet leh a, angaithla leh thin a, kan kalpel phei ta a.

Piangsual a min siamloh avang chauh pawh nilo in, piantha pangai a min siam vang ngawt pawh hian lawm hliah hliah tur kan lo ni.