Ka Samsung Wave II

Mobile phone lo changkang zel ah Smart Phone neih ve duhna rilru ka put leh ka handset hmasa Sony Ericsson W810, kum 4 zet ka lo hman tawh chiangkuan loh a in rual takah chuan lei thar rau rau ah Smart phone enge maw ber lei ve ka tum ruh ta hle a.

Ka phone hmasa Sony Ericsson W810 chu.... (a skin hi a tir ami kha kal hmang char char)

Smart phone chi hrang hrang ka'n en kual a, internet atangte in review te ka en kual a (Hetah hian gsmarena.com leh techradar.com hi ka en ngun ber te anni), a specification chi hrang hrang, company hrang hrang ka enkual fe hnu ah Samsung Wave II chu ka duh ang awm tam na leh ka hman duhna tur nen a inhmeh tur leh a man pawh ka phak tawk ang ber chu niin ka hria a. Thatloh na lai leh duhthusam lohna lai chu tam mahse Samsung Wave II lei tur chuan ka rilru chu ka siam fel ta a. Rilru dang put a thildang hmuh leh hma in ka lei ta tawp a. A lo tha phian reng a.

January 2011 thla tawpa ka lei kha a nia, ka hman hnu a experience hrang hrang te :

1. Processor : A processor hi 1 GHz ARM Cortex-A8 processor, PowerVR SGX540 GPU, Hummingbird chipset ani a. Mobile phone a tan chuan chak tha tawk tak ani a. Hetiang deuh chiah hi iPhone4 ah pawh hian an hmang a, mahse iPhone4 ami tlemte in ala chaklo zawk deuh hret a ngaih ani a, mahse a hman a hman ah chuan a hriat lemloh.

2. Screen : A screen hi 3.7" ani a. Ka mobile hmasa nen a en kawp chuan a hlai mah mah em aw ka ti ve tho a tirah chuan, mahse han hman than chuan hman a nuam in en a nuam em em mai a. Music video lek phei chu screen dang aiin ka mobile screen a en hi nuam ka ti mah zawk thin.

A screen ah hian Wave a Super AMOLED kha a awm tawhloh avangin Super Clear LCD capacitive touchscreen, 16M colors an hmang a, Nisa hnuaiah pawh a lang chiang tha khawp mai. Tin, a screen size ang tho a ka duh chu a resolution hi a ni a, 800 x 480 pixel an hmang a, hei hian a screen hi en a ti nuam in thil lang hi a chiang bik hle ani. Tin a colour leh contrast pawh hi a dik hle a. music video pawh Laptop screen nen pawh dang tak ani.



3. Battery : A battery hi Li-Ion 1500 mAh an hmang a, a daih rei khawp mai. darkar 1 vel Call na atana hman hian 10-15% vel aral a. Ni 3 chhung chu charge miahlo in, ren chuang silo in a hman theih ani.

4. Video Support : Video file hrang hrang a support hnem mai bakah a resolution sang a support hi hman a ti nuam khawp mai. Youtube atang hian mp4, 1280x 720 in ka download tlangpui a, hei hi convert buai leh ngai miahlo in a play thei nghal a. Mahse 1920x1080 chu a play thei thak lo thung. Tin movie hi avi file a kan download tlangpui hi a play theih zel bakah subtitle hi a support ve thlap a, a video file hming ang chiah khan a subtitle hming kha dah ila amah in a in load ve mai. Screen te a en chu a ho duh ang reng viau nangin, romance ang chi te leh ngaihthlak chet chet ngai chi te hi chu a en zawh ve mai theih zel.

5. Operating System : Operating system hi mi te duhlohna tak ani. BADA 2.0 a rawn chhawm sa a. He operating system hi samsung ho OS thar, an mahni develop ani a, ala lar lo hle. Hemi tihlarna tur anih vang hian hemi OS rawn chhawm te hi chu a hardware spec phulo in a tlawm vek a. Wave II a spec ang deuh chiah nei android OS hmang chu Rs. 8000 laiin aman pawh a inthlau reng ani.
Ka hman rei hnu hian tha ka ti chho ve zel a, bakah OS dang hi kala khawih lo hrim hrim a, han duh a han duhloh chhan tur kala neilo hrim hrim bawk. Ka hman rei hnu a ka hriat tak chu : Android te pawh Apps ngah hle mahse, apps tha zual ho chu lei ngai anni ve zel tho a, chuta karah apps tamtak chu i device hman laia hman theihloh te kha anlo ni ve leh zel a, chuvangin apps tam ringawt ah khan kan chhawr thei vek kherlo a. A tul zual kan chhawr hi a tawk viau ani. Bakah Apps hi hmanna tur a tam em em lo, hman reng hi a peihawm teh chiam loh a lo ni. :)

6. Call log : Call log properties hi chu samsung ho phone ah chuan a inang vek a, hei hi ka duh thar khawp mai. Mi pakhat no. pakhat i call log kha sms thawn zawng zawng leh call te kha a hrang theuh in a record a. Number pakhat a i call zawng zawng kha a hrang te te in i call rei zawng nen a record thlap a, nimin piaha i biak rei zawng leh vawiin a i biak rei zawng pawh compare theih ani. A tha ve mai mai. Mahse Number pakhat log kha 30 thleng a awm thei.

7. SMS : Sms chhut hi a nuam khawp mai, on screen keyboard hi a awm mai a, qwerty keypad a rawn lang a, a screen a hlai that bakah hmeh hi a response tha riau a. Chhut sual pawh a tam duh vaklo.
Group SMS hi a thalo khawp thung. Group sms thawn dawn in mi 20 thawn dawn ta la, mi 20 te contact ah khan no 2/3 (mobile no. vek) save ta la, tuna an hman lai, i thawn duhna tak kha i hriat vek angai, A nih loh chuan en that leh a thawn that leh thin angai a, default number ah a thawn mai lova, a ti buaithlak hle ani.

8. Camera : A camera hi 5 MP ani a, still camera ah chuan ka fak lemlo khawp mai. Ka phone hmasa 2 MP pawh a quality ah chuan a tluk lo a, mahse option chu an dah hnem khawp mai. Tul fetah lo chuan ka hmang zen zen lo. Mahse a video record hi chu ka fak khawp mai. 720p quality 30fps in a record thei a, a quality chu chhuanawm ve tak anih rualin a record sound hi device danga en hian a ri a sin deuh thin a, a sound avang hian convert angai leh fo mai.

9. Built : A built hi a tha khawp mai bawk a. enge an material hman hi ka hre chiahlo nangin a screen leh a body hi chem te in ka thai chhin tawh a, a rang lo ve ve.


10. Sound : A sound hi chu Sony Ericsson Walkman phone kum 4 lo ngaihthla tawh tan chuan duhthu a sam lo khawp mai. A bass erawh a tha a, earphone tha pangngai tak chuan ngaihthlak tlak tak chu ani ve tho bawk. A earphone a zir a equaliser set zel angai a. Equaliser-a manual a awmlo hi ka duhlo hle bawk.

11. User Interface : A UI hrim hrim hi ka lei dawn a ka hlauhthawnna ber pakhat ani, achhan chu samsung phone ho hi a hman a ninawm em em vek a. Mahse Wave II hi chu smart phone anih ve tawh vang nge ni, option a tam a, hman ninawm kha a awmlo khawp mai.

12. GPS : He device hi a tira ka lawm vak tura ka ngaih loh, lo tha em em si ani. ka neih thar hnu thla 1 vel kha chu GPS hi ka khawih lo hrim hrim a. A hnu ah google map java ka download a, chumi nen a tangkawp chuan ka kalna a piang ah ka hmang ta, thlaler zinna ah te, khawpui hriat ngailoh kalna ah te, aizawl thleng pawh in a hmu dik khawp mai. Tha tak ani tha tak.. Khawiah mah a bo theihloh tih hi a taka rawn thleng hi ani ringawt mai.

13. Memory : Inbuilt memory hi 2gb ani a. mahse hetah hian system hian 1.4 gb vel ahmang a, user tan 600 mb vel ala awm a. Box ah hian 2 gb memory card an rawn dah sa a, music dah nan leh video tlem azawng dah nan chuan a tawk khawp mai. Tunah hian 8gb ka hmang a, muan phah miahlo ka hmang thei a, a tha khawp mai.

14. Kies : PC-Suite hi KIES an ti a, hman a ninawm khawp mai, video a convert thei a, internet a connect thei a, Samsung Apps ah a lut thei a, software a upgrade thei a, Chuzawng chu ani deuh mai. Sms a khawih theihloh hrim hrim a, contact hi a backup ve thei a, mahse a back up sa pawh hi off-line (Phone connect loh) chuan a hmuh theih thak loh. Phone a bo chuan chhe duai ani tho.

15. Security : Samsung ka lei na chhan chu a security system vang hi ani. Mobile tracking a awm a, tin samsung website atangin kan handset awmna a hmuh theih bawk, miin lo ru palh ta se. Tih password hi sms te, notepad te, file manager ah te leh thil dang dang ah a dah theih a. miin an khawih pawhin password dah hmak chuan thil pawi an khawih ngailo, ui tung angai lo a, a zia phian.

16. SNS : SNS ngaipawimawh chunga an siam kha ani bawk a, SNS atan chuan atha khawp mai. Mi update en nan te, SNS chi hrang hrang a update neih na application pawh a tam khawp mai. Tin, i contact ah khan i thian te fb/twitter account kha i link thei a, an contact atang khan an status update te, thlalak thar te i check zung zung thei ani. Tin, heng bakah hian contact atang hian e-mail pawh direct in a thawn theih bawk.

17. Pages : Menu ah hian page 10 a awm thei a, page khatah hian apps 12 a awm thei a, apps ngah deuh chuan a tawk lo thei dawn khawp mai a. Bakah Apps ho hi folder ah awm lo in a menu ah hian a rawn awm tawp a, a ti buaithlak, Games leh Utilities tih vel te hi folder khatah khungkhawm se a zia deuh ang.

A tawp berah chuan ka duhna em em chu a "Hang" ve ngailo hi ani. January atang khan thla 5 ka hmanna tur ani a, vawi khat mah ala hang lo. Electromagnetic field hnaiha ken hi chuan a touch hi a buai ve deuh thin a, mahse lock han hmeh vang vang hian a tha veleh mai a. Tin, games lian deuh khelh hian not enough memory a rawn ti leh thin. Tin BADA Apps la tlem deuh mahse java a support a, apps tamtak a hman theih tho.

"Samsung berkher" tih hi ka dawng hnem khawp mai a, Mizo hi chuan Nokia hi kan ti tuah hum ringawt a. Nokia handset hi kala nei miahlo a, chhungte ta erawh ka hmansak ve zuai tawh. Rs. 3000 man chunglam ah chuan Nokia hi ka duhlo hulhual. a changkan pauh leh a hang nasa a, bakah UI ah hian an fail chiang khawp mai. Tunah pawh US ah chuan sales tlahniam nasa ber anni reng bawk a. HTC hi ka awt ang reng khawp a. mahse Mobile mai mai a. cheng 20000 sen ka tumlo bur. Hardware tha ah chuan ka budget a pel si. Iphone hi.. Iphone 4 hi ka thianpa ta nileng in ka kawl sak a, ka zir chian sak tawp, ka awt lemlo khawp mai (sawi tam tawhlo mai ila)

A in lenhleih ve khawp mai.

Mipa tan chuan hetiang gadget thar duh tak han neih te hi a nuam ve a. bakah ka neih hnu hian ka thiante pahnih ngawt in an lei ve leh der tawh a. Anni pawhin an fak angreng khawp mai. Smartphone starter atan chuan duhthusam ani screen lian duh ve si tan chuan.

CMWA hmingin chibai vek u le

Chennai khawpui a mizo awm tamtak ang bawkin ‘tumloh deuhin’ Chennai khawpuiah kan rawn thleng thla ve rawih a. Chennai hrehawm thu leh lum zia thu vawi duailo kan hre lawk bawk a, rilru pawh in puahchah sa ranin kan rawn chhuk a. Airport kan rawn thleng a, thlawhna kawngka atanga kan chhuak chu a lum ta huk a, ama’rawh chu thlawhna propeller hnunglam anih vangin a propeller in thli lum a rawn chhem mai mai amaw kan ti a. Mahse terminal atanga kan chhuan meuh chuan ka in rinlok ve ai mahin khua chu a lo lum tak tak ani tih chu chal kawlh a chhut fawk ang ani nghal pang!

Admission tihfel hnu chuan bazar leh beach te kan han tlawh ve a. Tih tur dang avang khawp mai. Thian ho, la in hre chianglo te te kha kan inkawm nitin ve thin a, mizo dang kala hmu lo a, Monica leh Lalthanzama kha ka hriatlawk awmchhun anni.

Ka rawn chhuk hnu a sunday hmasa berah chuan inkhawm ve reng reng ka duh a, midang chu a hma lama an lo inkhawm tawh avangin an chawlh tum ni kha ani hlauh pek a, keimahin kaldan tur leh kalna tur hrilh thlap hnu in ka chhuak ve thuai a. Egmore Train station hnung lamah chuan ka chhuak ve ngei a, ke a min 5/10 vel kal an tih vangin ka kal risk ta a, dar 3 tan an tia, dar 3 ah chuan egmore station chu ka thleng ve ngei tawh, vepery lamah ka phei tlang a, auto a kal te kha mizo amaw tiin ka zui ve tawp peka. EVK sampath road lamah ka phei a, Vai ho ka zawh lah khan tumah khan Wesley Church an hre silo. St. paul’s church, vepery kava thleng a. Mizo thawm reng reng a awm si lo. Purasavakkam High road ah rawn phei leh a, 7^th day biak In pakhatah an pastor ka zawt leh a, Mizoram chu a lo hre ve a, Mizo ho inkhawm na a hre chuang si lo. Ka kal zel a, ka beidawn tawh hnu ah dawr ah ka in ei puar a, haw paha ATM atanga pawisa ka la zo chu Egmore wesley church chu ka hmu ta kuau mai a. Luh loh law law ka tum laiin “Valin ka chhuahchhan ber ka hmuh ahnu,” biak in chu ka pan phei ta chawm mai a, thih leh thih. Chumi chuan 4:20 ani tawh. Mizo ho chu anni ta ngei a, semon kha ala zo lo deuh a (tan kha 3:30 alo ni zawk a), receptionist te nuih tlawn deuh reuh pah chuan ka lut zal zal a, a hnung berah inthlahrung takin kava thu a. Zama samsei kava hmu chu tlem chuan ka tlangnel nghal deuh a. Inkhawm banah chuan hmelhriat hlui dang pakhat ka hmu leh tih loh chu he chennai ah hian hmelhriat 3 bak ka nei lo tak zet tih ka chiang tawh hle a. Ka mikhual sawtin kan in hre leh hnuhnawh a!

Kum alo vei a, tamil ho zia kan han hre tanin, an veng hming lamdan te kan thiam ve tan a, khawpui chhung pawh kan han vak zau a, Khua chu lum mahse hrehawm lutuk kha chu a ni chiah biklo tih chu ka hre chho ve a. An lui tui pawh avai vai chuan a uih biklo tihte pawh kan hre zel a (uihlo hi kala hmu lo a, mahse uih veklo an ti miau awm tawh ten). Mahse tum chiahloh leh peihtawhloh lama phaia awm leh tih takah ka lo ning ve hle ni tur ani, 2009 chrismas ka haw theilo tur anga an han sawi kha chu rilru tak tak khan ka lungngai ve ani. Mahse ka haw veleh ta hram a. Lawmawm in.

Kum 2 alo vei meuh chuan nuam pawh kan lo ti tan ve a. Tamil ho pawh an that an felna laite leh an zeizia te kan han man chhoh ve takah chuan a hrehawm em em te a lo reh chho a. India ram hmun dang zawng ai chuan min hmuhsit lohna tak ni ten ka hria a (Mizoram leh NE lam an hre lo em a, ngo hrim hrim hi an ngaihsan rum rut vang te pawh ni mahna). Kan hriat ve chhun te te tha hi kan ti ve em em a, chenna tlak khawpui anih zia kan hrethiam ve a. “Thawh chhunzawmna tur tha deuh pawh awm se a pawi lem lo mawle” kan ti tan tawh a. Mahse in hauh an awlsam leh peih lutuk hi chu ngaiah kala nei thei lo ani.

Mizo lamah pawh hmelhriat thar kan nei ve tan a, Mizo community pawh mi min sawithaih lawk aia alo nawm em em si zia te kan hre ve ta zel a. Khawpui dang mizo te hian an thik vanga sawi chhia amawn chu ka ti let rilru hial zawk. Inkhawm bana mi chi hrang hrang kan han ding khawm a, in melh ru zeuh zeuh han awm nawk te, in be chak in be ngam silo phu suau suau te hi! He hun hi ava tah in ava uihawm si em! He hun reilo te hi malsawmna ah han chang thei thin teh se aw. Function kan nei tlem nanga kan neih chhun nawm thin si zia te, Sawihmaih phalloh, kan President Pu Lawmsanga kaisan kan lawm tum, hun nuam ropui lutuk thlen laia ka awm te kha ka lawm thar leh thin. Officer mess laichhuat kan mawi zia kha! Mahse nuam kan ti ve tan dawn chiahin sulhnu kan nei ve tan dawn chiah a, kan chhuahsan alo hun der a!

Ka damchhung kum 2 he khawpui nuam leh thangduang taka ka hmang ve hi inchhirna tur ka hre lo. Hriat tam pauh leh zirtur leh mahni mai ni lo midang leh ram tana tangkaina tur ka hmu hnem a, Hriatna tamtak ka chhar ve a, hlawkna tamtak nen ka haw dawn ani.

Mahse Mizoram boruak vawt diai mai leh a lum lai pawha nuam tawk chiah atang chuan chennai khaw lum nuam tak, kumpui linglet a thawmhnaw lum reng reng ngaih lohna hi ava ngaihawm dawn em! Bawng ek leh bal tinreng Mizoram lama awm ve lo tur te hi hnuk a ulh thei mai dawn. U Mawitei, chennai legend ropui lutuk, CMWA history a hming chuai leh tawh ngailo tur hmu hmana ka awm te hi mahni pawh in chhuan ve larh na tham. Mahse Chawia, chennai tlangval fel chhuan vawr, nula strong hold a hotupa, nula in a an zim huai huai chung pawh a tun thleng thleng a single a in la dah thei hi chennai nula te erawh ka dem na hle mai che u.

1 Jan atanga 31 dec thleng a Thosi awmloh lai reng reng awm lo te hi khawvel khawpui lian dang zawng aia a ‘cial na ani, aizawl ah chuan awm veleh dawn hek lo i. Sahuan han kal changa samak bula kan awm lai reng pawh a, a samak aia mak min tihna hmun, sikul naupang in a min en tak vung vung zawk na hmun te hi ava ngaihawm dangdai dawn e o. Bus leh local train tawt lutuk maiah nipui laiin kan han in hnawh lut ve a, thlan rim nam huam huam karah perfume man tlawm rimna zet rim anlo nam cham cham a, perfume a zawngah chuan rim huatthlala ber ani awm e. Thlan tui tih hriat fahran in min han nek ban chap a, lukolh deuh lu a thlan mawm deuh tawh ah ban kan han dek ban deuh chap chap a, thil dang ngaihtuah san tum pawhin, a rawn ban leh chap thin. Hriatreng turah chuan a hriatreng tlakloh ber awm asin!

Choolaimedu lamah leng ila an lo ni huau a, mipa awmkhawm tih takah nuih tur atam, in hrang hrang in rules hrang hrang, rules tura kan lo ngaih ngai lemloh, khirh tak tak thlengin an lo tlar diat diat a. Chepauk lamah lah Putara te Pitari te dil alo ngai thul, thenkhatah an hriatloh a luh ruk zal zal angai thul, thut tui laia in hnawh chhuah lah bo lo. Chaw eia sawm, ei rawngbawl vek tawh hnu, chaw ei hma si a hnawhchhuah tawk te pawh an awm ni awm ania! Veng hrang hrang VCP te kan han dahsan thiam zia te hi a tha asin. Tambaram lam kan len ve dawn apianga min hruai tur ber ‘a lo vellore’ leh daih mai thin hi chuh, enge maw a tih zozai ni? Pallavaram a chhungkaw khat awm vete in a rawn leng apiang nuam ti hahipa sawi chungin an haw ziah te hi tu thiamloh mah hi a awmlo, chennai hi a nuam sawhbeh mai ani tih hi a chiang ngawih ngawih ani ber mai e. “These hand prints on the footsteps are mine” kan la ti fo dawn ani. Kan tuan a tul tawh si.

This is my CMWA, You are my family away from my family. Hei hi chennai, ka khawpui, ka thatlai leh hlimlai nite ka hmanna, Puitlinna kawnga min hruaitu ani. Ka dam chhungin ka nghilh tawhlo ang che. Mualza tam kar danah leng dawn mah ila, rilru chhung rilah hmun tha lai tak ah i awm kum khua ang.

Khati zawng kha vawiin a kan puan theih te chu anni. Ka lawm e.